കോഴിക്കോട് നഗരസഭയെ മാലിന്യമുക്തമായി പ്രഖ്യാപിച്ചു. കോഴിക്കോട് ഫ്രീഡം സ്ക്വയറിൽ നടന്ന ചടങ്ങിൽ പൊതുമരാമത്ത്, വിനോദസഞ്ചാര വകുപ്പ് മന്ത്രി പി.എ. മുഹമ്മദ് റിയാസ് ആണ് പ്രഖ്യാപനം നടത്തിയത്. ദീർഘകാലത്തെ ചിട്ടയായ പ്രവർത്തനങ്ങളുടെയും ജനകീയ പങ്കാളിത്തത്തിന്റെയും ഫലമായാണ് ഈ നേട്ടം കൈവരിച്ചതെന്ന് മന്ത്രി പറഞ്ഞു.

മാലിന്യമുക്ത കോഴിക്കോട് എന്ന ലക്ഷ്യത്തോടെ കോർപ്പറേഷൻ ആവിഷ്കരിച്ച വിവിധ പദ്ധതികൾ വിജയകരമായി നടപ്പിലാക്കിയിരുന്നു. ഉറവിട മാലിന്യ സംസ്കരണം, അജൈവ മാലിന്യ ശേഖരണം, സംസ്കരണ പ്ലാന്റുകളുടെ പ്രവർത്തനം തുടങ്ങിയവയിൽ കോർപ്പറേഷൻ മികച്ച പ്രകടനം കാഴ്ചവെച്ചു. ഹരിതകർമ്മ സേനയുടെ പ്രവർത്തനങ്ങളും ഈ വിജയത്തിൽ നിർണായക പങ്ക് വഹിച്ചു.

ശുചിത്വ പ്രവർത്തനങ്ങളിൽ മാതൃകാപരമായ പ്രകടനം കാഴ്ചവെച്ച അങ്കണവാടികൾ, സ്കൂളുകൾ, ഉന്നത വിദ്യാഭ്യാസ സ്ഥാപനങ്ങൾ, സർക്കാർ സ്ഥാപനങ്ങൾ എന്നിവയ്ക്ക് പ്രത്യേക പുരസ്കാരങ്ങളും ചടങ്ങിൽ വിതരണം ചെയ്തു. ഈ നേട്ടം മറ്റ് തദ്ദേശ സ്വയംഭരണ സ്ഥാപനങ്ങൾക്ക് മാതൃകയാണെന്നും മന്ത്രി കൂട്ടിച്ചേർത്തു.